in

كاتب الهيبة 4 يهاجم تيم حسن ويوجه له رسالة قاسية

أحمد قصار أحد كُتّاب الهيبة لتيم حسن: “أنا ما كتبتلك “اسبت، وما تهكلو للهم ومنتهية وفرج!”

بدأ عرض مسلسل “الهيبة – الرد” بجزئه الرابع على قناة mbc ومنصة شاهد، حيث أخذ حيزاً كبيراً من الانتشار في الوطن العربي منذ بداية عرض جزئه الأول، وهو من بطولة تيم حسن، ومنى واصف، وأويس مخللاتي، وروزينا لاذقاني، وديمة قندلفت وعبدو شاهين وعادل كرم.

كتب الجزء الأول هوزان عكو في حين أكمل الجزءين الثاني والثالث باسم السلكا، وكان باسم قد أنهى حياة جبل وزوجته وابنه في نهاية الجزء، لكن عمدت شركة الصباح لإنتاج جزء رابع، فقررت إحياء جبل من جديد وإكمال مسيرته.

أما هذا الجزء فكتبه ورشة كتاب سوريين بعد فشل الاتفاق مع الكاتب فؤاد حميرة، الذي انتهى الأمر به كمشرف على الورشة “نظرياً”.

وبعد عدة ردود سلبية على المسلسل في السوشال ميديا كتب أحمد قصار أحد كتّاب الورشة منشوراً على صفحته في فيسبوك مهاجماً تيم حسن وجاء فيها:

“رسالة الى الممثل تيم حسن

ما بتذكر اني كتبتلك بالنص كلمة اسبت، وماتهكلو للهم ومنتهيه، وفرج… الخ من مفردات نمطك القديم
بالمناسبة كلمة فرج تعتبر كلمة نابية عنا بالشام، وكل ما واحد بقول فرج بيجي وراها الرد فورا بجملة
“يلي عطاك يا تحت الدرج”.. فما حلوة كل ما عم تقول فرج الناس عم تجاوبك فورا

المهم

خلينا نحكي بشكل علمي كونو نحن التنين دارسين سوا بنفس المكان ع ايدين نفس الأساتذة بعتقد،
بعيدا شوي عن المنفذين الحرفيين وافكارن، مالح يفهم علينا كتير.

المهم

حاولت.. لما بلشت كتابة، كسر نمطية الشخصيات بعد ما كانت منمطة كتير ومستنفذة بالأجزاء الماضية، وكانت عندي الرغبة بتحويل هي الأنماط لشخصيات ومنهن شخصيتك، ليكون عندهن صراع داخلي وبعد نفسي يلي بخلينا ما نتوقع ردات فعلن ويعطيهن تجديد ع صعيد كل شي.

ولتصير عملية التحويل هي من نمط لشخصية كان لازم اجراء تغييرات كبيرة بأحداث العمل وتعريض الأنماط لتحولات جذرية عميقة تنقل النمط لمكان تاني، وكان القرار بشخصيتك تعريض النمط جبل لفقدان العائلة بشكل مأساوي قادر على تغيير سلوك النمط، وخلق شرخ كبير طلع معدن الشخصية الأساسي وحولوا لشخصية وكمان تجربة العيش في العزلة بين الجرود، وهي مرحلة تطهير كبيرة تعرضتلها الشخصية وقدرت تغيرها وتيجي بشكل جديد ومعطيات جديدة ولغة جديدة، وصار هاد الشي وانت كممثل كنت موفق بكل التفاصيل عصعيد الشكل وتغير الأداء الأنفعالي، اما انك بعد هاد الجهد بتحويل الأنماط لشخصيات تروح تستعار مفردات النمط القديم وتستعملها ع الشخصية الجديدة بتكون عم تعمل خلل كبير يا حبيب، بضرك ألك اول شي، مشان ما يصير فيك متل غوار وحسني وياسينو لما النمط يبلع الممثل ويصير أكبر منو وتصير محاولات الخروج من هي النمطية عبثية وغير مجدية.

التحول يلي عملتو بالشخصية ع صعيد الأداء منيح كتير بس رجعت تنمط حالك بمطارح ماكان لازم تعمل هيك.

مهما ضغطو صناع النمط الفنيين يلي بعتقد حسب معرفتي فيهن ما بيعرفو يميزو بين النمط وبين الشخصية. والحل انك تطلع من هاد النمط لتروح لشي جديد بحياتك هي انك تعمل شخصيات.

اما بالنسبة لبداية المسلسل بالشارة كاتبين “تيم حسن في الهيبة” استاذ تيم حبيبنا “في” بدنا نبطلها ونوزن شوي ما حلوة في عالم كتير عم تشتغل وبتاخد العقل ومو شغلتها تدور بفلكك، وع قولت محمود درويش

نرسيس ليس جميلاً

كما ظنّ. لكن صُنَّاعَهُ

ورَّطوهُ بمرآته

يلا سلام تاني مرة وقت بدك ترتجل مالح قلك خود أذن لح قلك أستشير قبل ما تعمل هيك شغلات، وكان لازم مدرب الممثلين ينتبه ع هاد الشي كونو شخص اكاديمي بس ما بعرف اذا بيقدر يوجهلك ملاحظة.

ع فكرة انا حبيت المسلسل وحبيت شو عامل بس هيك حبينا نغاشك.

وصراعك ضد هدف نبيل وهو محاربة صناعة المخدرات من اسس تحويل شخصيتك ولو صحلي أقتلك بالمسلسل انت وعم تحارب لتحقق الهدف كنت عملتك أحلى بطل تراجيدي بس ما منقدر هاد باب رزق. بكل حب حبيب..

لاعاد تنمط حالك.

يلا سلام نسيت اعطيك مثال توضيحي. شخصية عبود ما كانت نمط رغم انو هيك بتبين.

فهمت علي ولا عيد يا سعيد.

انتهت الرسالة

دمشق _ باب سريجة _ ١١ تشرين التالت ٢٠٢٠”

وفتحت هذه الرسالة باباً آخر للتساؤل عن كيفية صناعة الهيبة حيث يبدو أن العمل أصبح ذو صبغة تجارية أكثر من ذي قبل، وعشوائي في تقديم نصوصه غير المتفق على صياغتها، خصوصاً أن الحكاية لم تنتهِ، بل ستكمل في جزء خامس ثم تختتم في فيلم سينمائي عام 2022.